ინფორმაცია ქალაქ სტენტორფში გამართული საფერავის ავსტრალიელ მწარმოებელთა მე-3 სიმპოზიუმის შესახებ
2024 წლის 6 სექტემბერს, ავსტრალიის თანამეგობრობის ქვინსლენდის შტატის ქალაქ სტენტორფში "ქვინსლენდის ღვინის ტურიზმის კოლეჯმა" უმასპინძლა საფერავის ავსტრალიელ მწარმოებელთა მე-3 სიმპოზიუმს. ღონისძიებას დაესწრო და დამსწრეთ სიტყვით მიმართა ავსტრალიის თანამეგობრობაში საქართველოს საგანგებო და სრულუფლებიანმა ელჩმა ბექა დვალმა. თავის გამოსვლაში მან ისაუბრა საქართველოზე და ქართული მეღვინეობის ტრადიციებზე.
სიმპოზიუმს, ასევე, დაესწრნენ სტენტორფის მერი მელისა ჰამილტონი და ქვინსლენდის შტატის პარლამენტის წევრი ჯეიმს ლისტერი.
საქართველოს ელჩმა სიმპოზიუმში მონაწილე საფერავის მწარმოებელ ავსტრალიურ კომპანიებს გადასცა "2024 წლის საფერავის საერთაშორისო კონკურსში" ბრინჯაოს, ვერცხლის და ოქროს მედლების მიღების დამადასტურებელი სიგელები.
სიმპოზიუმის პროგრამის ფარგლებში, "ქვინსლენდის ღვინის ტურიზმის კოლეჯმა", 2024 წლის 7 სექტემბერს, ასევე, უმასპინძლა ავსტრალიურ მეღვინეობებში წარმოებული საფერავის ღვინის საჯარო დეგუსტაციას.
