ინფორმაცია კანბერაში ქართული მხატვრული ფილმის "შინდისის" ჩვენების შესახებ

2023 წლის 8 აგვისტოს, ავსტრალიის დედაქალაქ კანბერაში, კამბრის კულტურული ცენტრის კინოდარბაზში, ავსტრალიის ეროვნული უნივერსიტეტის ფილმების ჯგუფის და ავსტრალიაში საქართველოს საელჩოს თანაორგანიზებით, გაიმართა რეჟისორ დიტო ცინცაძის ქართული მხატვრული ფილმის "შინდისის" კინოჩვენება. ფილმი ეფუძნება 2008 წლის აგვისტოში რუსეთ-საქართველოს ომის დროს ქართველი სამხედროების თავდადების და სოფელ შინდისის მაცხოვრებლების სამოქალაქო გმირობის რეალურ ისტორიას.

ფილმის ჩვენებას დაესწრნენ კანბერაში აკრედიტებული დიპლომატიური კორპუსის და ავსტრალიის საგარეო უწყების წარმომადგენლები, ასევე, ავსტრალიელი კინომოყვარულები.

ფილმის ჩვენების დაწყებამდე, ავსტრალიის თანამეგობრობაში საქართველოს ელჩს შესაძლებლობა მიეცა დამსწრე აუდიტორიასთან ესაუბრა რუსეთის მიერ საქართველოს წინააღმდეგ ათწლეულების განმავლობაში განხორციელებულ აგრესიაზე, მუდმივად წარმოებულ ჰიბრიდულ ომზე, 2008 წლის აგვისტოში რუსეთის მიერ საქართველოზე თავდასხმაზე, საქართველოს ტერიტორიების - აფხაზეთის და ცხინვალის რეგიონების მიმდინარე ოკუპაციაზე, ქართველების წინააღმდეგ განხორციელებულ ეთნიკურ წმენდაზე. 

დამატებით, ელჩმა ისაუბრა აგრესორი სახელმწიფოს შეკავების, საქართველოს ტერიტორიული მთლიანობის აღდგენის და კონფლიქტის მშვიდობიანი გზით გადაწყვეტის მიზნით, საერთაშორისო პარტნიორების მხარდაჭერით, საქართველოს უწყვეტ მშვიდობიან ძალისხმევაზე.

საქართველოს ელჩმა, ასევე, ყურადღება გაამახვილა ქართულ კინემატოგრაფზე და მის ტრადიციებზე.