ახალ ზელანდიაში მყოფ საქართველოს მოქალაქეების საყურადღებოდ!
კორონავირუსის (COVID-19) გავრცელების პრევენციული ღონისძიებების ფარგლებში, 27 აპრილის 23:59 სთ-დან ახალი ზელანდია გადასულია განგაშის მე-3 დონეზე, რომელიც ქვეყნის მასშტაბით ორი კვირის განმავლობაში (11 მაისამდე) შენარჩუნდება.
განგაშის მე-3 დონეზე:
- ნებადართულია განცალკევებით მცხოვრები ახლო ოჯახის წევრის მონახულება, თუმცა რეკომენდაცია სახლებში დარჩენაზე, თუ ეს არ წარმოადგენს გადაუდებელ საჭიროებას (მაგ: პროდუქტების და მედიკამენტების შეძენა, სამსახური, ვარჯიში და ა.შ.), კვლავ ძალაში რჩება.
- ძალაში რჩება შეზღუდვა მოგზაურობაზე. გამონაკლის შემთხვევებში, ნებადართულია ქვეყნის შიგნით, რეგიონიდან-რეგიონში გადაადგილება, თუმცა მხოლოდ ერთჯერადად და ერთი მიმართულებით (მაგალითად, რეგისტრაციის ადგილზე დასაბრუნებლად).
- შეზღუდულად აღდგება სასწავლო და ბიზნეს დაწესებულებების ფუნქციონირება - მთავრობის რეკომენდაცია დისტანციურ სწავლასა და მუშაობაზე კვლავ ძალაში რჩება.
მე-3 დონით გათვალისწინებულ შეზღუდვებთან დაკავშირებით დამატებითი ინფორმაციისთვის იხილეთ:
https://covid19.govt.nz/alert-system/alert-level-3/
საქართველოს საელჩო საქართველოს მოქალაქეებს ურჩევს თვალყური ადევნონ და დაემორჩილონ ახალი ზელანდიის მთავრობის მიერ გაცემულ რეგულაციებს. გთხოვთ, ასევე, გაითვალისწინოთ, რომ რეგულაციები ექვემდებარება ხშირ ცვლილებებს!
☎ საჭიროების შემთხვევაში დაუკავშირდით ავსტრალიაში საქართველოს საელჩოს ცხელ ხაზზე: +61 416 861 219