ვიქტორიის შტატის და ავსტრალიის დედაქალაქის ტერიტორიის მთავრობების გადაწყვეტილებით, COVID-19 მასიური გავრცელების პრევენციის მიზნით, 16 მარტის შუადღიდან, ხსენებულ შტატსა და ტერიტორიაზე 4 კვირის განმავლობაში გამოცხადებულია საგანგებო მდგომარეობა.
საქართველოს საელჩო მოგიწოდებთ, დაემორჩილოთ და თვალყური ადევნოთ ადგილობრივი ოფიციალური უწყებების მიერ გაცემულ რეკომენდაციებს.
☎ საჭიროების შემთხვევაში დაუკავშირდით ავსტრალიაში საქართველოს საელჩოს ცხელ ხაზზე: +61 416 861 219
არსებული მდგომარეობა
ვიქტორიის შტატი:
საგანგებო მდგომარეობის გამოცხადებით, ვიქტორიის შტატის ჯანდაცვის მთავარ ოფიცერს გაფართოებული უფლებამოსილება ეძლევა შტატის მასშტაბით, COVID-19 მასობრივი გავრცელების პრევენციული ღონისძიებების გატარების მიზნით.
ამ ეტაპზე, საგანგებო მდგომარეობა ითვალისწინებს:
- ავსტრალიაში საზღვარგარეთიდან დაბრუნებული ნებისმიერი პირის მიერ 14 დღიანი სავალდებულო თვითიზოლაციის დარღვევის შემთხვევაში, შესაბამისი დამსჯელი ღონისძიებების გატარებას (მაგალითად, ფულადი ჯარიმის დაწესებას 20 ათას ავსტრალიურ დოლარამდე);
- მასობრივი თავშეყრის ადგილების შეზღუდვას (იგულისხმება მასობრივი კულტურული და სპორტული ღონისძიებები 500 პირზე მეტის მონაწილეობით);
- სასწავლო დაწესებულებებში, ანუ სკოლებსა და უმაღლეს სასწავლებლებში მასობრივი თავშეყრის ღონისძიებების გამართვის შეზღუდვას. ამგვარ ღონისძიებებში მოიაზრება ე.წ. assemblies და საჯარო ლექციები;
- საჭიროების შემთხვევაში, მოქალაქეთა დაკავებას და გადაადგილების შეზღუდვას.
ამ ეტაპზე, საგანგებო მდგომარეობა არ ითვალისწინებს:
- სასურსათო მაღაზიების, სავაჭრო ცენტრებისა და სამსახურების დახურვას;
- სასწავლო დაწესებულებების, სკოლებისა და უნივერსიტეტების დახურვას;
- საზოგადოებრივი ტრანსპორტით გადაადგილების შეზღუდვას;
ვიქტორიის შტატის პრემიერის განცხადებით, 4 კვირიანი საგანგებო მდგომარეობა, სამომავლოდ, არ გამორიცხავს შეზღუდვების გაფართოებას (მაგალითად, ეპიდემიური ვითარების გაუარესების შემთხვევაში ქ. მელბურნის ზოგიერთი უბნის კარანტინში ჩასმა და სხვა).
დამატებითი ინფორმაცია:
https://www.premier.vic.gov.au/state-of-emergency-declared-in-victoria-over-covid-19/
ავსტრალიის დედაქალაქის ტერიტორია (ქ. კანბერა):
ავსტრალიის დედაქალაქის ტერიტორიაზე 16 მარტის შუადღიდან გამოცხადებულია ჯანდაცვის კუთხით საგანგებო მდგომარეობა.
საგანგებო მდგომარეობის გამოცხადებით, ავსტრალიის დედაქალაქის ტერიტორიის ჯანდაცვის მთავარ ოფიცერს გაფართოებული უფლებამოსილება ეძლევა, ტერიტორიაზე COVID-19 მასობრივი გავრცელების პრევენციული ღონისძიებების გატარების მიზნით.
ამ ეტაპზე, ჯანდაცვის საგანგებო მდგომარეობა ითვალისწინებს:
- ავსტრალიაში საზღვარგარეთიდან დაბრუნებული ნებისმიერი პირის მიერ 14 დღიანი სავალდებულო თვითიზოლაციის დარღვევის შემთხვევაში, შესაბამისი დამსჯელი ღონისძიებების გატარებას (მაგალითად, ფულადი ჯარიმის დაწესებას 8 ათას ავსტრალიურ დოლარამდე);
- მასობრივი თავშეყრის ადგილების შეზღუდვას (იგულისხმება მასობრივი კულტურული და სპორტული ღონისძიებები 500 პირზე მეტის მონაწილეობით);
- სასწავლო დაწესებულებებში, ანუ სკოლებსა და უმაღლეს სასწავლებლებში მასობრივი თავშეყრის ღონისძიებების გამართვის შეზღუდვას. ამგვარ ღონისძიებებში მოიაზრება ე.წ. assemblies და საჯარო ლექციები, სასკოლო ექსკურსიები და ბანაკები;
ამ ეტაპზე, საგანგებო მდგომარეობა არ ითვალისწინებს:
- სასურსათო მაღაზიების, სავაჭრო ცენტრებისა და სამსახურების დახურვას;
- სასწავლო დაწესებულებების, სკოლებისა და უნივერსიტეტების დახურვას;
- საზოგადოებრივი ტრანსპორტით გადაადგილების შეზღუდვას;
დამატებითი ინფორმაცია:
https://health.act.gov.au/public-health-alert/updated-information-about-covid-19